Удалив себе человеческаго сожительства,
в пещерах каменных и разселинах пожил еси
желанием Божественным и любовию,Петре,Господа твоего,
от Негоже венец приял еси: моли непрестанно спастися нам.

Притецем,вернии,со дерзновением к Милующей Царице Богородице
и умиленно воззовем к Ней: низпосли на ны милости
Твоя богатыя: град сей избави от всякаго обстояния,
мир даруй мирови и спасение душам нашим.

Церкве Христовы светильницы,всея России украшение,
святии вси,в земли Сибирстей просиявшии,
Владыку всех молите мир вселенней даровати
и душам нашим велию милость.

Иже во всем мире мученик Твоих,
яко багряницею и виссом,кровьми Церковь украсившися,
теми вопием Ти,Христе Боже: людем Твоим щедроты Твоя
низпосли,мир жительству Твоему даруй,
и душам нашим велию милость.

Яко начатки естества насадителю,
твари вселенная приносит Ти,Господи,богоносныя мученики:
тех молитвами в мире глубоце Церковь Твою,жительство Твое,
Богородицею соблюди,Многомилостиве.

Пресвятая Дева,моли Христа Бога о всех нас.

Вышних сил подражав,преподобне,образом птиц
житие пожил еси; временная в забытии положив,
непрестанным желанием влекомь к Небесным добротам
Христа Царя,дондеже Того достигл еси,Виссарионе:
моли непрестанно о всех нас.

Всеблаженная Матерь Божия,моли Христа Бога о нас.

Наста днесь всечестная память страстотерпца
благовернаго князя Игоря,созывающая люди
в пречестный храм Спасов,идеже радостно сошедшася
благочестивых множество молитвенно празднуют
святую память твою,и с верою взывают ти:
молися,святе,стране Российстей,граду Чернигову
и всем православным христианом в мире
и благоденствии спастися.

Святый Боже,святый крепкий,святый бессмертный,помилуй нас.
Святый Боже,святый крепкий,святый бессмертный,помилуй нас.
Святый Боже,святый крепкий,святый бессмертный,помилуй нас.

Слава Отцу и Сыну и Святому Духу,
и ныне и присно и во веки веков.Аминь.

Житие на земли добре окормляя,страдальче,
милостынями,и частыми молитвами,и слезами,
паки же ко страданию мужески устремився,
персское обличил еси нечестие.Темже Церкве был еси
утверждение и христиан похвало,Иоанне приснопамятне.

Благословен еси,Христе Боже наш,Иже премудры ловцы явлей,
низпослав им Духа Святаго и теми уловлей вселенную;
Человеколюбче,слава Тебе.

Егда снизшед языки слия,разделяше языки Вышний,
егда же огненныя языки раздаяше,в соединение вся призва,
и согласно славим Всесвятаго Духа.

Величаем Тя,Живодавче Христе,и чтим Всесвятаго Духа Твоего,
Егоже от Отца послал еси Божественным учеником Твоим.

Радуйся,Царице,матеродевственная славо:
всяко бо удобообращательная благоглаголивая уста
витийствовати не могут Тебе пети достойно; изумевает же
ум всяк Твое Рождество разумети.Темже Тя согласно славим.

Пречистая Матерь Божия,моли Христа Бога о нас.

Светлостию дел твоих просиял еси,преподобне,
апостольскаго престола наследник был,Никито,
и,яко солнце,облистал еси твоей пастве,отче,
вся Божественных учений исполнь.
Тем зовем ти: радуйся Халкидону удобрение.

Отечества,преподобне,удалився,в пустыню вселился еси
и,на остров Селигера езера возшед,жестоко житие показал еси,
и,многих добродетельми удивив,дарования чудес
от Христа приял еси.Поминай нас,чтущих память твою,
да зовем ти: радуйся,Ниле,отче наш.

Воистину достойно
воспевать Тебя,Богородицу,
Присноблаженную и Пренепорочную
и Матерь Бога нашего,
Честнейшую Херувим и Славнейшую
без сравнения Серафим,
без истления Бога Слова родшую,
сущую Богородицу,Тебя величаем!