Светлых подвиг твоих светоносный наста день,
воньже почитающи сих,Божественная Церковь
вся созывает весело вопити тебе:
радуйся,дево и мучениче,Агриппино всечестная.

Благочестно во святительстве пожив и мучения путь прошед,
идольския угасил еси жертвы,святителю Евсевие,
но яко имеяй дерзновение ко Христу Богу,
моли спастися душам нашим.

Добородетельми богатая,кротостию и благочестием украшенная,
возсияла еси чистотою жития твоего,сего ради Благий Бог
благослови тя быти материю светильника рода сербскаго,
тем же вопием ти: радуйся,преподобная мати Анастасие.

Светлыя постничества подвиги,радуяся,понесл еси,
Иулиане Богоблаженне,с преподобною Василиссою,
и страдания добльственно претерпел еси с честными
твоими страдальцы,с нимиже моли Христа Бога
спастися душам нашим.

Божественною любовию от юности распаляемь,преподобне,
вся красная,яже в мире,возненавиде,Христа единаго
возлюбил еси,сего ради в пустыню вселися,
идеже сподобися Божественнаго посещения,Егоже неудобь зрети
и ангельскима очима,паде,поклонися.Великий же Дародатель,
яко Человеколюбец рече к тебе: не ужасайся,возлюбленный Мой,
дела твоя угодна Мне.Се даю тебе дар: о коем-либо грешнице
помолишися,отпустятся ему греси.Ты же в чистоте сердца
твоего возгореся,прием воду и прикоснуся Неприкосновенному,
умы нозе Его и,воду пив,даром чудес обогатися,болящия
исцеляти,бесы от человек отгоняти и грешники от муки
молитвою своею избавляти.О преподобне отче Паисие,
молю тя,да умолиши и о мне,якоже тебе Бог обетова,
ибо от сих грешник первый аз есмь,да даст ми Господь
время покаяния и простит мое согрешение,яко Благий
и Человеколюбец,да со всеми и аз воспою Ему:
Слава Тебе,Боже наш!

Мучителей посрамил еси лукавая коварства
и еллинов обличил еси безбожное служение,
возсиял еси богоразумие всем человеком
ученьми благочестия,богомудре мучениче.
Сего ради твою память почитаем любовию,
премудре Леонтие.

Яко светильник пресветлый,явился еси в Российстей земли,
преподобне отче наш Тихоне,в пустыни вселився,
в нейже проходя жестокое жительство,яко безплотен,пожил еси,
сего ради и чудес дарованием обогати тя Бог.
Тем и мы,притекающе к мощем твоим,умильно глаголем:
отче преподобне,моли Христа Бога спастися душам нашим.

Величаем вас,святии вси,
в земли Российстей просиявшии,
и чтим святую память вашу:
вы бо молите о нас Христа,
Бога нашего.

Православия наставницы,благочестия и чистоты учителие,
Церкви Вологодстей богодарованное украшение,
преподобнии отцы наши Григорие и Кассиане,
молите Милостиваго Бога,да вашим предстательством
подаст благодать и мир стране нашей и душам нашим спасение.

Красоту возжелев славы Божия,
в земней тому благоугодил еси и,порученный ти талант
добре возделав,усугубил еси,о немже и подвизався до крове.
Отонудуже и мзду болезней твоих,яко мученик,приял еси
от Христа Бога: Егоже моли спастися поющим тя,Лазаре.

Познан быв от пелен освящен и явлься благодатей исполнен,
чудесы мир озарил еси и демонов множество отгнал еси,
священнодетелю Феодоре,темже о нас молися Господеви.

На земли подвизался еси,яко безплотный,
и Небеса наследовал еси,Мефодие,яко изъяснивый в концех
икон поклонение,в трудех бо и болезнех вящше пребыв,
не престал еси дерзновением,обличая
отметающияся иконы Христовы.

Плоды добродетелей на земли принесше,преподобнии отцы,
в Небесных чертозех ныне благоухаете,яко райстии цвети,
и лицем к лицу зрите Пресвятую Троицу,Юже дерзновенно
молите спастися душам нашим.

Девства твоего добротами предочистивши душу твою,
на высоту мучением востекла еси,Акилино всечестная,
любовию Жениха твоего Христа уязвившися,Емуже со Ангелы
предстоиши,веселящися,с Нимиже не престай молящися о всех нас

Духом Божиим наставляемый,возлюбил еси безмолвие,
в немже евангельски подвизающуся,пречудный Афонский дар,
Богоматере икона,дароваси ти,всеблаженне,и,образ
добродетелей еси быв стаду твоему,Арсение отче наш,
к Горнему торжеству возшел еси,идеже со Ангелы ликовствуя,
моли Христа Бога спастися душам нашим.