Яко невещественных существ зрителя изрядна
и деятельна сказителя всеистинна,взывает тя стадо твое,
богоглагольниче; не оскудей,моля о рабех твоих,
избавитися напастей и обхождений,вопиющим ти:
радуйся,отче Афанасие.

Христову Церковь цевницею языка твоего,песнословя умильно,
возвеселил еси,богословием же Препетыя Троицы славу всем
сказал еси ясно,тем тя,яко тайноглагольника,поем,Андрее,
пастырю Критский,и величаем память твою,
Христа славяще дивнаго во святых Своих.

Вострубив ясно Божественная сладкопения,явился еси
светильник мира светлейший,светом сияя Троицы,
Андрее преподбне; темже вси вопием ти:
не престай моляся о всех нас.

От земли Возведый тя к вечным обителем
соблюдает и по смерти невредимо тело твое,святе Иоанне,
ты бо в целомудрии и чистоте жития блаженне пожил еси,
не осквернив тело,темже со дерзновением моли
Христа Бога спастися душам нашим.

Древо жизни посреде души своея,веру Твою,Христе,
стяжавый Твой мученик,едемскаго рая честнейший бысть,
древо прелести змиевы погубив дерзновенно духом,
венчася славою Твоею,Многомилостиве.

Брата Божия на престоле архиерейства преемниче,
святаго града Иерусалима иерарше достохвальне,
с богомудрыми отцы в Халкидоне изъяснил еси
воплощение Сына Божия,пришедшаго мир обновити
и обожати вся человеки,в Церкви Его и с Ним сочетавшияся,
святителю отче Иувеналие,предстоя ныне во Царствии
Отца светов,о почитающих тя любовию молися,
да мир и милость Спасова будет с нами.

Мудрости благодатию,отче,украшенный,
труба богогласная показался еси Духа
и добродетелей наставник,Никодиме Богоглаголивый,
всем бо подаеши спасительная учения,жития чистаго
показуя сияние богатством Божественных твоих словес,
имиже,яко свет,мирови возсиял еси.

Юношески процвел еси во отечествии твоем,
добротою украшен,и неправедную и безвременную смерть
подъял еси,Уроше всечестне; царскаго корене плод сладок,
аще и не во время созрев,в Господню житницу вселился еси
и жалость велию сродству твоему оставил еси.
Молися о нас,творящих святую память твою.

Апостолов первопрестольницы и вселенныя учителие,
Владыку всех молите мир вселенней даровати
и душам нашим велию милость.

Твердыя и Боговещанныя проповедатели,
верх апостолов твоих,Господи,приял еси в наслаждение
благих Твоих и покой: болезни бо онех и смерть приял еси
паче всякаго всеплодия,Едине сведый сердечныя.

Величаем вас,апостоли Христовы Петре и Павле,
весь мир ученьми своими просветившия
и вся концы ко Христу приведшия.

От мирскаго жития изшедше,отвержением мира
Христу последовасте,и достигосте великаго Нева езера,
и в нем на острове Валааме всельшеся,равноангельное житие
пожили есте: отонудуже,веселящеся,прешли есте
к Небесным чертогом.И ныне со Ангелы Владычну Престолу
предстояще,поминайте нас,чад своих,яже собрали есте,богомудрии,да радостно от души вопием:
радуйтеся,Сергие и Германе,отцы преблаженнии.

Предстательство и покров жизни моея полагаю Тя,
Богородительнице Дево: Ты мя окорми ко пристанищу Твоему,
благих виновна,верных утверждение,Едина Всепетая.

Сад присноцветущ,добродетелей плоды приносяй,
явился еси на садовне древе,яко благопеснивая птица;
рай же паче,жизни древо,Господа,в сердцы твоем прием,
яко возделав,богомудре,имже питаеши нас благодатно;
присно моли о нас,Давиде всеблаженне.

Болезньми святых праведных отроков Иакова и Иоанна,
имиже о Тебе пострадаша,умолен буди,Господи,
и вся наша болезни исцели,Человеколюбче,молимся.

Добродетелей ревнителю,пустынный житель,
подвижник веры Христа Бога нашего,
пощением и труды умертвивый плотская вожделения,
тезоимените великому Антонию,егоже житию поревновал еси
и во егоже имя Божественный храм воздвигл еси,
купно с ним,преподобне Антоние,моли Спасителя всех,
да и нас сотворит победители плотских похотей
и храмы Духа Святаго,по велицей Его милости.

Бога Слова познал еси,яко пророк,в матерней утробе,
и,сея языка употребив,богословиши в темне чертозе,
обожаемь Светом Неприступным.

Величаем тя,Предтече Спасов Иоанне,
и чтим еже от неплодове преславное рождество твое.

Новии мученицы,древнюю прелесть твердым борением
низложившии,вознесоша веру православных,
беззаконное бо служение уничиживше,
дерзновенно Христа проповедаша,Бога совершенна,
и ныне непрестанно молятся даровати нам велию милость.