Аврааму в вере подражая,Иову же в терпении последуя,
отче Филарете,благая земли разделял еси неимущим
и лишение сих терпел еси мужественне.
Сего ради светлым тя венцем увенча
Подвигоположник,Христос Бог наш,
Егоже моли спастися душам нашим.

Яко апостолов первозванный и верховнаго
сущий брат Владыце всех,Андрее,молися
мир вселенней даровати и душам нашим
велию милость.

Мужества тезоименитаго богоглагольника
и Церкве восследователя верховнаго,
Петрова сродника восхвалим:
зане якоже древле сему,и ныне нам воззва:
приидите,обретохом Желаемаго.

Величаем тя,апостоле Христов Андрее,
и чтим болезни и труды твоя,
имиже трудился еси во благовестии Христове.

Добродетельми яко лучами солнечными
просветила еси неверныя мудрецы,и якоже пресветлая луна
ходящим в нощи неверия тьму отгнала еси,
богозванная невесто,блаженная Екатерино.
Желанием востекла еси в небесный Чертог к Прекрасному
Жениху Христу,и от Него царским венцем венчалася еси.
Ему же со Ангелы предстоящи,за ны молися,
творящия пречестную память твою.

Лик честный Божественне мучениколюбцы
воздвигните ныне,почитающе всемудрую Екатерину:
сия бо в тризнищи Христа проповеда,и змия попра,
риторов разумы укротивши.

Величаем тя,страстотерпице Христова Екатерино,
и чтим честное страдание твое,яже за Христа претерпела еси.

Избранный чудотворче и изрядный угодниче Христов,
многоцелебный источниче и молитвенниче о душах наших,
святителю Отче Митрофане,
яко имеяй дерзновение ко Господу,
от всяких нас бед свободи,зовущих:
Радуйся,Митрофане,великий и славный чудотворче.

О преславнии мученицы Гурие,Самоне и Авиве!
К вам,яко скорым помощникам и теплым молитвенникам,
мы немощнии и недостойнии прибегаем,усердно моляще:
не презрите ны,во многая беззакония впадшая и по вся дни
и часы согрешающия и скорбящия;соблюдите ны
в непорочнем и целомудреннем житии;и якоже древле,
тако и ныне покровители супружеств пребудите,
в любве и единомыслии сия утверждающе
и от всех злых и бедственных обстояний избавляюще.
Защитите,о многомощнии исповедницы,
вся православныя христианы от напастей,злых человек
и козней демонских;оградите я от нечаянныя смерти,
умоляюще Всеблагаго Господа,да великия и богатыя милости
нам,смиренным рабом своим,пробавит.
Несмы бо достойни нечистыми устнами призывати
великолепое имя Создателя нашего,аще не вы,
святии мученицы,за ны ходатаи будете;
сего ради к вам прибегаем и предстательства вашего
пред Господем о нас просим.Такожде избавите нас
от глада,потопа,огня,меча,нашествия иноплеменных,
междоусобныя брани,смертоносныя язвы и всякаго
душепагубнаго обстояния.Ей,страстотерпцы Христовы,
устрояйте нам молитвами вашими вся благая и полезная,
да благочестно житие временное прошедше и кончину непостыдну
стяжавше,удостоимся теплым заступлением вашим
со всеми святыми одесную Правосуднаго Бога Судии стати
и Того непрестанно славити со Отцем и Святым Духом
во веки веков.Аминь.

Всякое естество ангельское удивися о превелицей красоте
девства Твоего,всесвятая Дево.Ты бо со ангелы
во святая святых пребывающи,Сама возжелала еси
в чистоте ангельской и неврежденном Своем девстве
вечно жити.Сего ради дала еси обет девства
и обручила еси Себя на присное служение Богу
в чистоте девичестей,и уневестилася еси Ему,
да Духом Святым преуготована будеши
в чистое и нетленное селение Слову Божию,
поюще Ему день и ночь:Слава Тебе,Боже наш.

Духа Святаго благодать стяжав,
богомудре святителю Филарете,
истину и правду разумом просвещенным
людем проповедал еси,мир и милость
сердцем умиленным страждущим явил еси,
яко учитель веры и страж неусыпный
паству Российскую жезлом правости сохранил еси.
Сего ради ко Христу Богу дерзновение имея,
моли даровати Церкве утверждение,
людем и душам нашим спасение.

Чудеса святых Твоих мученик
стену необориму нам даровавый,Христе Боже,
тех молитвами советы языков разори,
Церковь святую укрепи,яко един Благ и Человеколюбец.

Православию наставниче,святителем украшение,
Богословцем поборниче непобедимый,Григорие чудотворче,
Солуню великая похвало,проповедниче благодати,
моли Христа Бога спастися душам нашим.

Уст твоих,яко же светлость огня возсиявши,
благодать вселенную просвети:
несребролюбия мирови сокровища сниска,
высоту нам смиренномудрия показа,
но,твоими словесы наказуя,отче Иоанне Златоусте,
моли Слова Христа Бога спастися душам нашим.

Мужескомудрено утаившися вражиих лукавых путей,Матроно,
к жизни воистину шествовавши несумненною волею
и неуклонное течение Богомудро скончавши,
от Христа прияла еси благодать духовную,
тем и воду цельбам источаеши любовию притекающим
в память твою славную,мнихом похвала,
моли Христа Бога спастися душам нашим.

Апостоле святый Ерме,
моли милостиваго Бога,да прегрешений
оставление подаст душам нашим.

Величаем тя,апостоле Христов Ерме,
и чтим болезни и труды твоя,
имиже трудился еси во благовестии Христове.

Слез твоих теченьми пустыни безплодное возделал еси,
и,иже из глубины воздыханьми,во сто трудов уплодоносил еси,
и был еси светильник вселенней,сияя чудесы,
Иоанникие,отче наш:
моли Христа Бога спастися душам нашим.

Святии безсребреницы и чудотворцы,Космо и Дамиане,
посетите немощи наша:туне приясте,туне дадите нам.

Благодать приимше исцелений,
простираете здравие сущим в нуждах,врачеве,
чудотворцы преславнии:но вашим посещением
ратников дерзости низложите,мир исцеляюще чудесы.

Величаем вас,чудотворцы славнии Космо и Дамиане,
и чтим святую память вашу,наставницы заблуждшим,
исцелители болящим и собеседницы Ангелом.

Возложь на ся иго Христово от юности,
преподобне отче Иове,
многолетне свято подвизался еси
на поприще благочестия во обители Угорницстей
и на острове Дубенстем,и,пришед к горе Почаевстей,
знаменанней цельбоносною стопою Пресвятыя Богородицы,
в тесней пещере каменней богомыслия ради и молитвы
многократно заключался еси,и,благодатию Божиею укреплялся,
мужественно потрудился еси на пользу Церкве Христовы
и обители твоея,купно же и противу врагов Православия
и благочестия христианскаго,и,наставив сицевому ополчению
иночествующих,победители тех представил еси Владыце и Богу.
Того моли спастися душам нашим.