Звезду Российскую от Киева возсиявшую,
и чрез Новград Северский в Ростов достигшую,
всю же страну сию ученьми и чудесы озарившую,
ублажим златословеснаго учителя Димитрия,
той бо всех приобрящет,якоже Павел Христу,
и спасет правоверием души наша.

Величаем тя,святителю отче Димитрие,
и чтим святую память твою,
ты бо молиши за нас Христа Бога нашего.

Днесь вера Христова утверждается камнем веры,
и ликовствует в веселии Иоппия,
псаломски славословят Жизнодавца Сына Божия вернии,
видяще совершаемо велие чудо:
первоверховный апостол глаголет,и умршая востает от гроба,
юже Низложитель смерти дарует Церкви,
да украшаются во образ ея добродетельми люди.
Приидите убо,христиане,принесем ко святей моления наша:
блаженная Тавифо и милосердная,
вознеси наша воздыхания Пресвятей Троице и молися
со дерзновением,да сынове Света Превечнаго будем,
да сподобимся Божия милости,да пребываем в любви Божественней,
и да царствует мир во вселенней.

Велие веры чудесе,в пещере,яко в чертозе царском,
святии седмь отроцы пребыша,и умроша без тли,
и по мнозех временех восташа,яко от сна,
во уверение воскресения всех человеков.
Тех молитвами,Христе Боже,помилуй нас.

Всякаго естества ангельскаго превысшая
явилася еси,Пресвятая Дево:
Бога бо зачала еси плотию,Невместимаго всеми
вместила еси во утробе Твоей,на руках носила еси
Носящаго весь мир дланию:
темже,яко честнейшую херувим и славнейшую
без сравнения серафим величающе Тя,вопием о Тебе Богу:
Слава Тебе,Боже наш!

Апостольских деяний сказителя
и Евангелия Христова светла списателя,
Луку препетаго,славна суща Христове Церкви,
песньми священными святаго апостола похвалим,
яко врача суща,человеческия немощи,
естества недуги и язи душ исцеляюща
и молящася непрестанно за души наша.

Весело возрадовася Церковь в память днесь
приснопамятнаго страдальца Лонгина,взывающи:
Ты моя держава,Христе,и утверждение.

Благоукрашается вселенная,Ефиопия ликовствует,
яко венцем красуема,тобою просветившися,
светло торжествует память твою,
Благоглаголиве Филиппе,
вся бо веровати Христу научил еси
и течение совершил достойно Евангелия.
Тем дерзновенно варит Ефиопская рука к Богу,
Егоже моли даровати нам велию милость.

В тебе,мати,известно спасеся еже по образу:
приимши бо крест,последовала еси Христу,
и деющи учила еси презирати убо плоть,преходит бо,
прилежати же о души,вещи безсмертней.
Темже и со ангелы срадуется,преподобная Пелагие,дух твой.

Первии учитилие прежде темному,
ныне же светлому и новопросвещенному граду Казани,
первии возвестителие пути спасительнаго,
истиннии хранителие апостольских преданий,
столпи непоколебимии,благочестия учитилие
и Православия наставницы,Гурие и Варсонофие,
Владыку всех молите мир вселенней даровати
и душам нашим велию милость.

Глас апостола Твоего Павла услышав,глаголющ:
мы юроди Христа ради,
раб Твой Андрей,юрод бысть на земли
Тебе ради,Христе Боже.
Темже ныне память его почитающе,
Тебе молимся,Господи,спаси души наша.

Днесь благовернии людие,светло празднуем,
осеняеми Твоим,Богомати,пришествием,
и к Твоему взирающи Пречистому образу,умильно глаголем:
покрый нас честным Твоим Покровом и избави нас
от всякаго зла,молящи Сына Твоего,Христа Бога нашего,
спасти души наша.

Дева днесь предстоит в церкви и с лики святых
невидимо за ны молится Богу:
Ангели со архиереи покланяются,
апостоли же со пророки ликовствуют:
нас бо ради молит Богородица превечнаго Бога.

Величаем Тя,Пресвятая Дево,и чтим Покров Твой честный,
Тя бо виде святый Андрей на воздусе за ны Христу молящуюся.

Днесь Ангели с человеки радуются вкупе с общим веселием.
Небо и земля светло ликуют в память ти,святе.
И мы,грешнии,прилежно ти вопием:
помолись к Владыце о нас,избавити ны от напасти
видимых и невидимых враг,чтущих пресветлую ти память.

Помяни нас во Твоих молитвах,Госпоже Дево Богородице,
да не погибнем за умножением грехов наших.
Покрый нас от всякаго зла и лютых напастей:на Тя бо уповаем,
и Твоего Покрова праздник чествующе,Тя величаем.

Апостоле Христу Богу возлюбленне,
ускори избавити люди безответныя,
приемлет тя припадающа;Егоже моли,Богослове,
и належащую тьму языков разгнати,
прося нам мира и велия милости.

Христовою любовию уязвився,преподобне,
и Тому невозвратным желанием последовав,
всякое наслаждение плотское возненавидел еси,
и яко солнце отечеству твоему возсиял еси,
тем и Христос даром чудес обогати тя.
Поминай нас,чтущих пресветлую память твою,
да зовем ти:радуйся,Сергие богомудре.

Ублажаем тя,преподобне отче Сергие,
и чтим святую память твою,
наставниче монахов и собеседниче ангелов.