Яко светильника незаходимаго умнаго солнца,
сошедшеся днесь,восхваляем в песнех:
возсиял бо еси сущим во тьме неведения,
вся возводя к Божественней высоте,Иларионе,
темже вопием: радуйся,отче,всех постников основание.

поправка: вся исцеляяй//болящия и призывающия

Истинною бо Христовою верою утверждься,страстотерпче,
мучителя злочестива царя победил еси со идольским того
возношением.Тем от Царя Великаго,вечно царствующаго
пресветлым венцем победным одарен бысть,вся исцеляй болящия и призывающия тя,Артемие великий,
моли Христа Бога спасти души наша.

Благочестиваго и венценоснаго мученика,на враги победы
вземшаго одоление,сошедшеся,достойно песньми восхвалим
Артемия,превеликаго в мученицех,чудес же дателя пребогатаго:
молится ко Господу о всех нас.

Христу последуя,мучениче Уаре,Того испив чашу,
и мучения венцем увязеся,и со ангелы ликовствуеши:
моли непрестанно за души наша.

Светильницы светлии явльшеся,Божественнии мученицы,
тварь всю светлостию чудес озаряете,недуги разрешающе
и глубокую тьму всегда отгоняюще,
Христу Богу молящеся непрестанно о всех нас.

Пустынное и безмолвное житие возлюбивши,
и во след Христа,Жениха твоего,усердно потекши,
и Того благое иго во юности твоей вземши,
крестным знамением к мысленнным врагом мужески
вооружившися,постническими подвиги,постом и молитвами,
и слезными каплями углие страстей угасила еси,
достославная Параскево; и ныне в Небесном чертозе
с мудрыми девами предстоящи Христу,моли о нас,
почитающих честную память твою.

Святую вси заступницу сущим в бедах,
благочестно воспоим Параскеву всечестную:
та бо,житие оставльши тленное,и нетлеемое
прият во веки,сего ради славу обрете,
чудес благодать,Божием велением.

Светильницы светлии явльшеся,Божественнии мученицы,
тварь светом чудес озаряете,недугов разрешающе
глубокую ночь всегда и Христу Единому Богу
молящеся непрестанно о всех нас.

Престол Царя Славы,честнейшая Херувим,
одушевленный храме,в немже вселися Господь,
твердь небесная,на нейже возсия Солнце правды,Христос,
Тя,поем,Богомати,и превозносим во вся веки.

Украшен добродетельми,Космо богодухновенне,
Церкве Христовы украшение был еси:
песньми бо украсил еси сию,блаженне.
Но молися ко Господу избавитися нам от всяких
козней ратника,тебе зовущим: радуйся,отче требогате.

Святых мученик исправлением Небесныя силы преудивишася,
яко в теле смертнем безтелеснаго врага силою Креста,
подвизавшеся добре,победиша невидимо.
И молятся Господу помиловатися душам нашим.

Троицы нам славу явиша,доблии Христовы оружницы и мученицы,
с Тарахом Пров же и Андроник: обличиша бо вси
мучителей безбожие,верою доблественне страдальчествовавше.

Тривеличайшия светильники,всех преподобномученик
Богоизбранный полк,двадесять и шесть Божественныя обители
Зографския отец,почтим,прелесть латинскую обличившия
и насильственно во огни скончавшиеся;Фому пастыреначальника,
священнаго Варсонофия,достославнаго Парфения и прочия,
подвизавшияся,сошедшеся,песньми почтим,сии бо
Троицу Святую присно о нас умоляют.

Доблия мученики и братию по плоти,
мудраго Евлампия и Евлампию почтим,
тии бо пребеззаконных кознодейства
посрамиша силою Распеншагося:
сего ради явишася мучеников
слава,купно и похвала.

Тело твое постами изнуривши,бденными молитвами
Творца умолила еси о деяниих твоих,яко да приимеши
совершенное оставление,еже и обрела еси,мати,яве,
путь покаяния показавши.

Удобрение Христовых страстотерпец и очи Христовы Церкве,
очи просветите душ наших,Сергие многострадальне
и Вакше преславне: молитеся ко Господу,яко да убежим
тьмы греховныя и Света явимся общницы невечерняго
молитвами вашими,святии.

Разум на враги мужески вооруживше,
всю тех лесть разрушисте,и,победу свыше приимше,
мученицы всехвальнии,единомысленно вопиюще:
добро и красно,еже быти с Богом.

Крепким разумом,Харитино,душу утверждши верою,
борителя врага,яве посрамила еси,у Христа предста,
всеблаженная,червленицу от кровей твоих носящи,
и присно со Ангелы радуешися,моли за ны,страстотерпице.