Во святителех благочестно пожисте,
и люди Богоразумию настависте,и добре Богу угодисте,
сего ради от Него нетлением и чудесы прославистеся,
яко ученицы Божия благодати.

От художества волшебнаго обратився,богомудре,
к познанию Божественному,показался еси миру врач мудрейший,
исцеления даруя чествующим тя,Киприане,со Иустиною:
с неюже молися Человеколюбцу Владыце спасти души наша.

Божественными добродетельми духа измлада украсився,
Романе премудре,Церкве Христовы пречестное украшение был еси:
пением бо прекрасным украсив Ю,блаженне.Тем молим тя:
подаждь желающим Божественнаго дарования твоего,
яко да вопием ти: радуйся,отче преблаженне,красото церковная.

Тебе припадаем,Госпоже,верою,
и покланяющеся благодарно вопием Ти:
радуйся,Богоблагодатная Дево,покрове
и ограждение наше,Помощнице в беде сущим,
спаси нас,к Тебе прибегающих,на Тя бо надеемся.

Ублажаем тя,преподобне отче Григорие,
и чтим святую память твою,
наставниче монахов и собеседниче ангелов.

Чистотою душевною Божественне вооружився
и непрестанную молитву яко копие вручив,
крепко ссекл еси демонская ополчения,
Кириаче отче наш: молися непрестанно о всех нас.

Насладився,богомудре,воздержания и плоти твоея
вожделения обуздав,явился еси верою возращаемь,
и,яко жизни древо,посреде рая,процвел еси,
Харитоне всеблаженне,священнейший.

Многообразныя раны претерпевше и венцы от Бога
яве приимше,о нас молитеся,блаженнии,Христу,
память всепразднственную вашу совершающих,
величайший Каллистрате,со страдавшими с тобою,
еже умирити паству и люди: Той бо есть верных утверждение.

Вышнюю жизнь возжелевши получити,
дольнюю сладость тщательно оставила еси
и самую себе смесила еси посреде мужей,краснейшая:
Христа бо ради Жениха твоего,о обручнице привременном
небрегла еси.

Уязвивши твое сердце,добродево,любовию Христовою,
обручника временнаго яко небрегома преобидела еси
и на огнь дерзнула еси,зверей же уст заградила еси:
и спасшися от них,прилежаше Павла ищущи,
Фекло первострадальная.

Оружие сердце Твое пройде,Пречистая,
егда Сына Твоего на кресте видела еси,
и вопияла еси: не безчадну Мя покажи,Сыне Мой
и Боже Мой,соблюдый Мя по рождестве Деву.

Слава Отцу и Сыну и Святому Духу,
и ныне и присно,и во веки веков.Аминь.

Страсти Христовы яве подражав
и Сего испив усердно чашу,общник,Евстафие,
и славы снаследник был еси,от Самаго всех Бога
приемля с высоты Божественное оставление.

От юности вашея Христови любви прилепившеся,святии,
усердно закон и оправдания Того сохранисте: отонудуже
и чудесными дарованьми обогатившеся,исцеления источаете,
Феодоре,Давиде и Константине,о верою вас почитающих,
молите Христа Бога спастися душам нашим.

Явися велие солнце Христове Церкви,просвещая
учением светлостьми,всечестне,яко черпалом златым
от кладезя неископаннаго чудес почерпл еси от Источника
неистощимаго,на успение свое приспел еси,всеблаженне Феодоре,
ныне всем даеши грехов прощение.

Светом Божественным просветився,всеблаженне,
просвещаеши ны,любовию поющия твое честное
и славное и святое,отче,преставление,
иерарше Евмение,моля непрестанно о всех нас.

Подвигом добрым подвизался еси,первомучениче Христов
и апостоле,и мучителей обличил еси нечестие.Камением бо
побиен от рук беззаконных,венец от яже свыше десницы
приял еси,и к Богу взывал еси,вопия:
Господи,не постави им греха сего.