Возвысив ум твой к Богу,и жития со Ангелы возжелел еси,
тленную славу земную оставил еси,блаженне,и положил еси
душу твою за люди твоя,восприял еси венец противу трудов
твоих,Богомудре Михаиле,моли Христа Бога о чтущих
любовию святую память твою.

Вышних ища и земную славу презрев,
Церковь Божию обагрил еси твоею кровию,
за нюже и пострадал еси,святе Михаиле,
заколение неправедное прием,веселяся:
темже со Ангелы предстоя Христу Богу,
моли непрестанно за вся ны.

Мученик Твой,Господи,Дасие,во страдании своем
венец прият нетленный от Тебе,Бога нашего;
имеяй бо крепость Твою,мучителей низложи,
сокруши и демонов немощныя дерзости.
Того молитвами спаси души наша.

Христову мученику Адриану тезоименит был еси,преподобне,
многия труды подъял еси в жизни временней,
обитель иноческую созидая в пустыни,
идеже пострадал еси даже до крове от злых разбойник
и мученическую смерть от них приял еси,Адриане славне,
чудес благодатию обогатився,предстоиши всех Царю,Христу Богу,
Егоже моли спастися душам нашим.

От духовнаго наставника научився,царю Иоасафе,Бога познати,
Крещением же просветився,люди к вере обратил еси,
и отцу твоему от купели приемник быв,царство оставив,
пустыню достигл еси и в ней трудолюбне подвизался еси.
Моли Христа Бога со учителем твоим Варлаамом
спастися душам нашим.

Ведый твое из младенства благое изволение,Иоасафе,
един сердцеведец Бог,и от царствия земнаго
в монашеское пребывание приведый тя,
великому Варлааму последовати сподоби.
С нимиже и ныне горний Иерусалим всесветлый
Отечество имея,желаемыя доброты красно наслаждаяся,
Святыя Троицы,молим тя,царская красото,
поминай нас,верою чтущия тя.

Явился еси преудивлен крепостию,
всесожжения ливан благовонен,
себе принесл еси жертву Христу,
и,венец почести приим,Варлааме,
присно моли за ны,страдальче.

Святая твоя память,вселенную веселит,
созывающи верныя вся в пречестный храм твой,
идеже ныне,радостию совокупльшеся,поем в песнех
и светлостех.Сего ради,Платоне,вопием ти:
языческаго нашествия избави град твой,святе.

Воинства исхити привременнаго
и нетленнаго показа тя Небеснаго общника,
страстотерпче Мино,Христос Бог наш,
Иже мучеников нетленный венец.

Удом усекновение терпел еси и огненную
лютую муку,мучениче,подвигся,всеславне,
венцем яве увязеся нетленным,преблаженне,
Престолу же предстоиши Святыя Троицы,Юже помоли,
да спасет ны,мучениче Оресте,верою поющим тя.

Мученик двоица,пострадавше крепко,
вражию гордыню на землю низложисте,
озарившеся благодатию Несозданныя Троицы,
славнии Онисифоре и Порфирие,
молитеся непрестанно о всех нас.

Величаем вас,Архангели и Ангели и вся воинства,
Херувими и Серафими,славящии Господа.

Лик мученический ясен,полк светоносен,
сошед к нам разумно,Церковь днесь просветил есть
чудными зарями,темже празднующе честную память их,
просим от Тебе,Спасе наш: тех молитвами от бед
избави нас,да поем Ти: Слава Тебе,Боже наш.

Мученик Христовых полком причтостеся,добре храбрствовавшим:
светло подвизавшеся,Галактионе славне,с честною супружницею
и сострадавшею тебе Епистимиею,Единому Богу
непрестанно молитеся о всех нас.

Мученик Твой,Господи,Никандре,во страдании своем
венец прият нетленный от Тебе,Бога нашего;
имеяй бо крепость Твою,мучителей низложи,сокруши
и демонов немощныя дерзости.Того молитвами спаси души наша.

Яко пленных свободитель и нищих защититель,
немощствующих врач,победоносче великомучениче Георгие,
моли Христа Бога спастися душам нашим.

К возбранному и скорому заступлению твоему прибегше,вернии,
молим избавитися,страстотерпче Христов,от соблазн вражиих
воспевающим тя и всяких бед и озлоблений,
да зовем: радуйся,мучениче Георгие.

Божественная,мудре,непорочно тайноводил еси,
жертва приятна был еси,богоблаженне: Христову бо пил еси
чашу славно,святе Акепсимо,со страдальцы твоими,
моляся непрестанно о всех нас.