Мученик Твой,Господи,Полиевкте,во страдании своем
венец прият нетленный от Тебе,Бога нашего;
имеяй бо крепость Твою,мучителей низложи,
сокруши и демонов немощныя дерзости.
Того молитвами спаси души наша.

Страстотерпцы Господни блаженнии,
Православную веру Христову со дерзновением проповедасте
и на судищи учения врагов неправая обличисте,
того ради и ввержени бысте,святии,во глубину речную,
души же ваша вселишася в Небесныя кровы,
идеже со святыми предстояще Престолу Царя всех Бога,
молитеся Ему за вся православныя люди,
подвиги ваша честно почитающия.

Чистыя Девы Бога воплотившия сродник был еси,
блаженне Предтече,с Неюже тя чтим и молим,
иже в Божественнем храме твоем ныне живуще,
храмы и нас сотвори Духа Святаго.

Слава Тебе,предвечный Боже,велию благодать и человеколюбие
в Крещении Твоем всем человеком явившему.
Слава Тебе,Победителю жизни,новую чистую жизнь
не по плоти,но во обновлении духа даровати благоволившему.
Слава Тебе,Царю царствующих,яко царство мира сего
отселе в Царство Твое начинает прелагатися.
Слава Тебе,Единородный Сыне и Слове Божий,
напитай сердце мое явлением словес Твоих.
Слава Тебе,Сыне Божий,во Иордане крестивыйся
и весь мир просвещей,слава Тебе.

Крепость даяй царем нашим Господь,
и рог помазанных Своих возносяй,от Девы раждается,
грядет же ко Крещению.Тому вернии возопием:
несть Свят,яко Бог наш.

Избран от Бога,возлюблен от людей,
архиереов Божественная красото,отче Евстафие,
Ангелов служителю,таин же Божественных проповедатель был еси,
темже моли Христа Бога со всеми святыми избавитися
от всяких зол молитвами твоими,блаженне,
и спастися нам,чтущим любовию
святую память твою.

Твоя поты,преславне,всю землю напоиша,
и честными кровьми,Гордие,мир весь возвеселил еси.
Молитвами твоими,Богомудре,спасай вся,
верою тя воспевающия и ублажающия,
вопиющия песнь достойную,всехвальне,яко многострадалец.

Наста светоносный день чудесных подвиг твоих,
страстотерпице преславная,днесь Божия честная Церковь
празднует и созывает вопити тебе: радуйся,дево мученице,
Анисие всеблаженная.

Страстотерпцы Господни,блаженна земля,напившаяся
кровьми вашими,свята селения,приимшая телеса ваша:
в подвизе бо врага победисте и Христа со дерзновением
проповедасте.Того,яко Блага,молите спастися,
молимся,душам нашим.

Тверди душею по вере,святии,огнем страдания
приемше две тьмы страдальцев,вопиюще Рождшемуся от Девы:
приими всесожжения наша за Тя,якоже дары персских царей,
злато,и смирну,и ливан,Превечный Боже.

Благородия нравом тя честноподобне украсив
обоживый Господь,в рабии образе от Девы нам соединися,
Иже тя в лик свещеносиц вчини и с мученики сочета,Евгение,
яко воистинну благородия Божественныя славы венец улучи.

Правильно так читать имена мучеников,иже в Крите: Феодула,Саторнина,Евпора,Геласия,Евникиана,Зотика,
Помпия,Агафопуса,Василида и Евареста.

Денница возсия мучеников честное страдальчество,
предозаряющее нам в вертепе Раждаемаго,
Егоже Дева безсеменно роди.

Победоноснаго Воскресения истинноименитая наречена еси,
мученице Христова,победы на враги поставила еси мук терпением,Христа ради,Жениха твоего,Егоже возлюбила еси.
Того моли спасти души наша.

Девства добротами преочищена,девице,
и мучения венцы,Иулиание,ныне венчавшися,
даеши сущим в нуждах и недузех исцеление и спасение
приступающим к раце твоей: Божественную бо благодать
Христос источает и жизнь вечную.

Мудрость,Слово и Сила,Сын сый Отчий и Сияние,
Христос Бог,сил утаився,елико премирных,
и елико на земли,и вочеловечься обновил есть нас,
яко прославися.

Бог сый мира,Отец щедрот,Великаго Совета
Твоего Ангела,мир подавающа послал еси нам:
тем Богоразумия к свету наставльшеся,
от нощи утренююще,славословим Тя,Человеколюбче.

Се Дева,якоже древле рече,во чреве приемши
родила есть Бога вочеловечшася,и пребывает Дева.
Еяже ради примирившеся Богу грешнии,
Богородицу сущую воистинну вернии воспоим.

Радуйся,Обрадованная Невесто Царя Великаго,
яко Тобою от клятвы Евины вси,Чистая,избавихомся,
и жизнь обретохом,в Рождестве Твоем,Неневестная.