Искупил ны еси от клятвы законныя Честною Твоею Кровию,
на Кресте пригвоздився и копием прободся;
безсмертие источил еси человеком,Спасе наш,слава Тебе.

Нас ради Распятаго,приидите,вси воспоим,Того бо виде
Мария на древе,и глаголаше: аще и распятие терпиши,
Ты еси Сын и Бог Мой.

Возвестителю пути спасительнаго,
истинный хранителю апостольских преданий,
столпе непоколебимый,благочестия учителю
и Православия наставниче,святителю Варсонофие,
Владыку всех моли мир вселенней даровати
и душам нашим велию милость.

К Богородице прилежно ныне притецем,грешнии и смиреннии,
и припадем,в покаянии зовущи из глубины души:
Владычице,помози,на ны милосердовавше,потщися,
погибаем от множества прегрешений.
Не отврати Твоя рабы тщи,Тя бо и едину надежду имамы.

Послушание святое,нарицающееся живот,
преподобне отче Руфе,прием,
живот вечный оным постигл еси,
идеже живя,не забуди и нас,хвалящих тя.

Иаков рыдаше Иосифова лишения,
той же доблий седяше на колеснице,яко царь почитаемь:
египтяныни бо тогда сластем не поработав,
воспрославляшеся от Ведущаго человеческая сердца
и Посылающаго венец нетленный.

Чертог Твой вижду,Спасе мой,украшенный,
и одежды не имам,да вниду вон:
просвети одеяние души моея,Светодавче,и спаси мя.

Спогребшеся Тебе Крещением,Христе Боже наш,
безсмертныя жизни сподобихомся воскресением Твоим,
и воспевающе зовем: осанна в вышних,
благословен Грядый во имя Господне.

На престоле на небеси,на жребяти на земли носимый,
Христе Боже,Ангелов хваление и детей воспевание
приял еси зовущих Ти: благословен еси,Грядый Адама воззвати.

Величаем Тя,Живодавче Христе,осанна в вышних,
и мы Тебе вопием: благословен Грядый во имя Господне.

Святителя Твоего,Христе,творящим светло торжество успения,
милость Твою свыше подаждь,отверзи же Царствия двери,
разреши же узы наша многих грехов ходатайством
святаго Твоего ученика,отца нашего.

Покаяния источник неисчерпаемый,
утешения податель некончаемаго и умиления
пучина еси,Иосифе,слезы нам подаждь покаяния Божественнаго,
имиже утешение,зде плачущеся,обрящем от Бога,
твоея помощи просяще,святе.

Величаем тя,страстотерпице Христова Феодосие,
и чтим честное страдание твое,еже за Христа претерпела еси.

Днесь благовернии людие,сошедшеся,
восхвалим добляго сего мученика и страдальца Авраамия,
сей бо,укрепляемь силою Божиею,душу свою положи за Христа,
много пострадав от зловерных болгар.
Сего ради от Господа венец прият и ныне предстоит Ему
и молится о граде сем и о всех нас,чтущих память его.

Греха мглы избежавши,покаяния светом озаривши
твое сердце,славная,пришла еси ко Христу,Сего
Всенепорочную и святую Матерь молитвенницу
милостивную принесла еси.Отонудуже и прегрешений
обрела еси оставление и со Ангелы присно срадуешися.

Ярем Господень измлада восприим,и Того стопам
невозвратным желанием последовал еси,
и освященнаго подвига достигл,
святительства паству приим и чудес от Бога дары прият,
с верою приходящим к раце мощей твоих подаеши
различным недугом исцеление неоскудно,
отче наш Ионо,святителю Христов,
моли Христа Бога даровати нам велию милость.

Во вся страны полунощныя изыде вещание твое,
яко приемшия слово твое,ихже боголепно научил еси,
неведущия Христа светом Евангелия просветил еси,
человеческия обычаи украсил еси,Российская похвало,
святителю отче наш Иннокентие,моли Христа Бога
спастися душам нашим.

Cпасти хотяй мир от прелести вражия,
Человеколюбец Господь избра Тя от земнаго рода,
от малаго града и от неплодныя утробы в Матерь Себе,
от века предопределенную,пророки же древле проповеданную,
Ходатаицей быти нашего спасения,да будеши
печальным и в бедах сущим скорое утешение
и мирскаго неплодства разрешение,всемже
во мраце греха блуждающим да явиши
Солнце правды Христа,поющим Ему:
Слава Тебе,Боже наш.

Всерадостное дарование от Бога святым женам -
святые дети; всерадостное даяние и тебе,святая Еввуло,-
святый великомученик Пантелеимон,милости тезоименитый,
недугующих целитель и наш заступник.Слава убо о нас
Всемилостивому Владыце,слава Подающему вами цельбы,
слава предстатели наши вас Показавшему.