Благословен Бог

Превечно от Отца возсиявша
Бога Слова во утробе плотию заченшую
вси ублажаем,яко Матерь всех Бога.

Воплотися Бог по Ипостаси,Чистая,
из Тебе плоти соединяемь,пребыв неизменен,
по Божественному существу безплотен.

К Богородице прилежно ныне притецем,
грешнии и смиреннии,и припадем,в покаянии
зовуще из глубины души: Владычице,помози,
на ны милосердовавши,потщися,погибаем
от множества прегрешений,не отврати
Твоя рабы тщи,Тя бо и едину
Надежду имамы.

Препрославленная Вышняго Матерь
созывает к песнопению нас Своего образа
пришествием от Царьграда и возбуждает зрением того
на подвиг,побеждати сопротивных силу,и к Ней,
яко нашея радости виновней,пети: Радуйся,
Невесто Богоневестная.

Слава Отцу и Сыну и Святому Духу,
и ныне и присно,и во веки веков,аминь.

О,многострадальная и премудрая великомученице Христова Софие!
Ты душею на небеси у Престола Господня предстоиши,на земли же,
данною тебе благодатию,различная совершаеши исцеления:
призри убо милостивно на предстоящия люди и молящияся
пред мощами твоими,просящия твоея помощи: простри ко Господу
святыя молитвы твоя о нас,и испроси нам оставление согрешений
наших,недужным исцеление,скорбящим и бедствующим скорую помощь:
умоли Господа,да подаст всем нам христианскую кончину и добрый
ответ на Страшном Суде Своём,да сподобимся и мы купно с тобою
славити Отца и Сына и Святаго Духа во веки веков. Аминь.

Пренепорочная Дево,отображение Лика Твоего чтущия,
благодарныя дары приемлеши,живым и мертвым помогаеши,
град и страну нашу спасаеши,и пред Сына Твоего,
молитвы приносиши и спасаеши всех нас.

Всякаго существа вышшее,
Слово Божие воплощенно нам родила еси:
темже Богородицу Тя устнами и душею проповедуем.

Величаем Тя,Пресвятая Дево,Богоизбранная Отроковице,
и чтим образ Твой святый,имже точиши исцеления
всем,с верою притекающим.

Госпоже Всепетая Богородительнице,
моя помышления Твоими молитвами очистивши,
покажи мя благоплодна,Мати всех Бога.

Величаем Тя,Пресвятая Дево,Богоизбранная Отроковице,
и чтим образ Твой святый,имже точиши исцеления
всем,с верою притекающим.

Воздвизаему Древу,окроплену Кровию
воплощшагося Слова Бога,пойте,небесныя силы;
земных воззвание,празднующе людие,поклонитеся
Христову Кресту,имже миру востание во веки.

Слава,Господи,Кресту Твоему Честному.

Животворящий Крест Твоея благости,
егоже даровал еси нам,недостойным,Господи,
Тебе приносим в молитву,спаси люди и град Твой
молящийся,Богородицею,Едине Человеколюбче.

Неискусобрачная Бога плотию рождшая,
страстными прилоги преклонена мя утверди:
несть бо,Чистая,разве Тебе помощница.

Величаем Тя,Пресвятая Дево,Богоизбранная Отроковице,
и чтим образ Твой святый,имже точиши исцеления
всем с верою притекающим.

Гору святую,превышнее Носило,
Матерь Божию и Деву Истинную
по рождестве воспоим.

Пресвятая Богородице,спаси нас.

Хотением смотрения Своего вся сотворивый,Пречистая,
из Тебе воплотивыйся Бог Истинный,и Человек Совершенный.

Слава Отцу и Сыну и Святому Духу,
и ныне и присно,и во веки веков,аминь.

Источник исцеления и веры Православныя утверждение
Почаевская Твоя икона,Богородице,явися,
темже и нас,к ней притекающих,от бед
и искушений свободи,Лавру Твою невредиму сохрани,
Православие во окрест стоящих странах утверди
и грехи разреши молитвенник Твоих:
елика бо хощеши,можеши.

Пресвятая Богородице,спаси нас.

Слава Отцу и Сыну и Святому Духу,
и ныне и присно,и во веки веков,аминь.

Песнь всяку духовную принесем Богородице.

Величаем Тя,Пресвятая Дево,
и чтим образ Твой честный,имже
показала еси преславное знамение.