Во всего Адама облексе Христе,
очерневшее изменив просветил еси древле естество,
и изменением зрака Твоего богосоделал еси.

Слава,Господи,святому Преображению Твоему.

Неизменное естество,человеческому примешся,
обильно невещественнаго Божества свет,
изобнажив апостолом,неизреченно возсия.

Слава,Господи,святому Преображению Твоему.

Величаем тя,страстотерпице Христова Иулитто и чтем
честное страдание твое,еже за Христа претерпела еси.

Невесто Христова возлюбленная,Серафимо,
наследнице Царствия Небеснаго,добре за Господа
пострадавшая,и кровию твоею обагренная и,аки царскою
багряницею украшенная,поминай нас,совершающих
святую память твою.

О Пречудная и Превышшая всех тварей Царице Богородице,
Небеснаго Царя Христа Бога нашего Мати,
Пречистая Одигитрие Марие!
Услыши нас грешных и недостойных
в час сей молящихся и припадающих к Твоему
пречистому образу со слезами и умиленно глаголющих:
изведи нас от рова страстей,Владычице Преблагая,
избави нас от всякия скорби и печали,огради
от всякия напасти и злыя клеветы,и от неправеднаго
и лютаго навета вражия. Можеши бо,о Благодатная Мати наша,
от всякаго зла сохранити люди Твоя и всяким благодеянием
снабдити и спасти; разве Тебе иныя Предстательницы в бедах
и обстояниих и теплыя Ходатаицы о нас,грешных,не имамы.
Умоли,Госпоже Пресвятая,Сына Твоего Христа Бога нашего,
да удостоит нас Царствия Небеснаго; сего ради всегда славим Тя,
яко Виновницу спасения нашего,и превозносим святое
и великолепое имя Отца и Сына и Святаго Духа,
в Троице Славимаго и покланяемаго Бога,
во веки веков. Аминь.

Тщание имущи сообразно имени твоему,тезоименитая,
равноимянную тебе веру в сожительство избрала еси,
Параскево победоносная,темже изливаеши исцеления
и молишися о душах наших.

Ты еси Ангелов радость,
Ты еси праведников доброта,
Ты еси верных надежда,Ты еси соблюдение наше,
Ты еси мост,к жизни нестареющейся преводяй
верою и любовию Тя величающия.

Пресвятая Богородице,спаси нас.

Взбранной Воеводе родов христианских
и страны нашея известней избавительнице
хвалебныя песни принесем,вернии,
на святей горе Ея собравшеся; Ты же,
яко имущая милосердие неизреченное,
о Владычице Богородице,моления нашего
пред чудотворным Твоим образом возносимаго,
не отвержи,да в умилении сердец зовем Ти:
Радуйся,похвало Почаевская и всего мира
надеждо и утешение.

Обнищавшему Слову премногим милосердием,Марие Магдалини,
яве яко ученица истинно послужила еси,зряще же Сего,
на Кресте вознесена и во гробе положена,рыдала еси,слезящи.
Темже тя почитаем и твое совершаем верою торжество,
мироносице славная,моли Христа Бога грехов оставление
подати чтущим любовию святую память твою.

Святая равноапостольная Марие Магдалино,
моли Бога о нас.

Избранной Предвечным Царем в наше верных спасение
небесе и земли Царице,благодарственныя похвалы
приносим Ти,Богородице! Ты же,яко имущая
державу непобедимую и милосердие неизреченное,
от всяких нас бед свободи и вся благая нам даруй,
да зовем Ти: Радуйся,Мати Дево,всепетая христиан похвало.

Агница Твоя,Иисусе,Марино,зовет велиим гласом:
Тебе,женише мой,люблю и Тебе ищущи страдальчествую,
и сраспинаюся и спогребаюся крещению Твоему,и стражду
Тебе ради,яко да царствую в Тебе,и умираю за Тя,
да и живу с Тобою: но яко жерву непорочную
приими мя с любовию пожершуюся Тебе.
Тоя молитвами,яко милостив,спаси души наша.

Величаем Тя,Пресвятая Дево,Богоизбранная Отроковице,
и чтим образ Твой святый,имже точиши исцеления
всем,с верою притекающим.

Яко необоримую стену и источник чудес,
стяжавше Тя,рабы Твои,Богородице Пречистая,
сопротивных ополчения низлагаем. Темже молим Тя:
мир граду Твоему даруй и душам нашим велию милость.

Моли Бога о мне,святой угодник Божий Владимир,
поскольку усердно к тебе обращаюсь,скорому
помощнику и молитвеннику о душе моей.

Небесных воинств Архистратиже,
молим тя присно мы недостойнии,
да твоими молитвами оградиши нас
кровом крил невещественныя твоея славы,
сохраняя ны,припадающия прилежно и вопиющия:
от бед избави ны,яко чиноначальник Вышних Сил.

Просвети душу мою,ум и сердце,Премилостивая
Мати Божия,и даждь ми дар воспети Тя,
крепкую Предстательницу,благих Ходатаицу
и в печалех сладкое утешение.

Пресвятая Богородице,спаси нас.